Fjórtán ára drengur tók eigið líf á klósetti grunnskóla. Fyrir tveimur vikum síðan frétti tólf ára systir hans að hann hefði ekki mætt í kennslustund og fór á klósettið þar sem hann faldi sig iðulega fyrir aðilunum sem lögðu hann í einelti. Hún fann hann ekki og ákvað hún því að hringja í hann. Hún heyrði í símanum hans hringja inni á klósettinu og hafði samband við starfsfólk skólans. Í ljós kom að hann hafði tekið eigið líf.
Bradley John var í St. John Lloyd, kaþólskum skóla í Suður-Wales, og var lagður í einelti fyrir að vera með athyglisbrest. Faðir hans, Byron John, ræddi um málið í morgunþætti ITV í Bretlandi í morgun og lýsti því þegar tólf ára dóttir sín, Danielle, fann stóra bróður sinn á klósetti skólans.
„Danielle vissi strax hvar hann var því hann fór alltaf þangað. Það versta við þetta er að hún heyrði í símanum hans hringja hinum megin við hurðina,“ sagði Byron. Hann þakkar viðbrögðin: „Sjúkraflutningamennirnir voru ótrúlegir, hann gat hafa verið þarna í klukkutíma, en þeir reyndu samt allt til að bjarga honum, þeir reyndu í einn og hálfan tíma.“
Byron sagði að sonur sinn hefði verið lagður í mikið einelti vegna þess að hann var með athyglisbrest og hann hefði verið niðurbrotinn síðasta vor. „Hann var ekki eðlilegur. Hann var öðruvísi. Athyglisbresturinn gerði hann pirraðan og gerði það að verkum að hann tók mikið inn á sig. Hann skildi aldrei af hverju fólk kom illa fram við hann.“
Hann segir að næsta verkefni sé að koma núverandi skólameistara frá, gefur hann lítið fyrir yfirlýsingar frá skólanum um að allir séu til staðar fyrir Danielle þegar enginn hafi reynt að tala við hana. „Hún hefur lifað vítiskvalir frá því hún fann bróður sinn.“