„Þetta var umfangsmikil aðgerð. Það var mikið af lögreglubílum sem umkringdu skemmuna og það mátti greina mjög skært ljós út um hurðina,“ segir sjónarvottur á Breiðdalsvík sem fylgdist með umfangsmikilli lögregluaðgerð í bænum. Samkvæmt heimildum DV beindist aðgerði, sem fram fór í morgun, gegn kannabisræktun í umræddri skemmu. Aðgerðinni var stjórnað af Lögreglunni á höfuðborgarsvæðinu með aðstoð lögreglunnar á Austurlandi. Ekki liggur fyrir hvað lagt var hald á margar plöntur á þessari stundu.
Skemman sem um ræðir er um 150 fermetrar að stærð. Núverandi eigandi hennar keypti eignina um mitt sumar árið 2013 á nauðungarsölu. Kaupverðið var 400 þúsund krónur. Ekki liggur fyrir hversu lengi grunur er um að ræktun hafi átt sér stað í húsinu.
Lögregluna á höfuðborgarsvæðinu neitaði að tjá sig um málið að svo stöddu og vildi lögreglan á Austurlandi einnig ekki tjá sig um aðgerðina. Aðgerðin var á allra vörum í bæjarfélaginu en innan við 200 einstaklingar búa á Breiðdalsvík.
