Það líklegast algengasta spurningin sem fólk sem komið er yfir tíræðisaldurinn fær, hvað sé leyndarmálið að baki langlífinu. Hin 105 ára Brenda Osborne frá Nottingham á Englandi kom öllum á óvart með sínu svari. Lykillinn að langlífi sé að forðast karlmenn.
Brenda, sem fagnar í dag 105 ára afmæli sínu, segir það karlmannsleysinu, vinnusemi og fersku lofti að þakka að hún sé orðin svona gömul, en hún bjó í hjólhýsi á sumrin eftir að hún fór á eftirlaun fyrir meira en 30 árum.
Hún fæddist árið 1913, sama ár og Ölgerð Egils Skallagrímssonar var stofnuð og Morgunblaðið hóf göngu sína. Brenda bjó í 93 ár í sama húsinu og starfaði sem hjúkrunarfræðingur, þar á meðal í síðari heimstyrjöldinni. Hún tók sér einn veikindadag á 33 árum.
„Mín heilsa byggir á vinnusemi og að forðast karlmenn,“ sagði Brenda í samtali við fjölmiðla sem heimsóttu hana á hjúkrunarheimilið í tilefni af afmæli hennar. „Ég hef alltaf gaman af því að eiga afmæli en ég varð fyrir vonbrigðum að drottningin skyldi ekki mæta. Ég fékk bréf frá henni en mér finnst nú lágmark að hún komi í heimsókn.“
Þess má geta að Elísabet II Englandsdrottning er 13 árum yngri en Brenda.