Tap á rekstri Frjálsrar fjölmiðlunar, sem gefur út DV og á m.a. netmiðlana dv.is, pressuna.is, eyjuna.is, bleikt.is og 433.is, nam 54,5 milljónum króna árið 2017.

Þetta kemur fram í ársreikningi félagsins.

Félagið tók við rekstri miðla sinna í september á síðasta ári. Karl Garðarsson framkvæmdastjóri félagsins segir að rekstrarumhverfi fjölmiðla hafi verið erfitt á liðnu ári og það sem af er þessu ári. Þar komi til mikil og hörð samkeppni, auk þess sem hallað hafi mjög á einkarekna fjölmiðla í samkeppni við RÚV, sem njóti mikils forskots, bæði á auglýsingamarkaði og hvað varðar fjárveitingu frá ríkinu. Því sé nauðsynlegt að fyrirhugaðar aðgerðir stjórnvalda til styrktar einkareknum fjölmiðlum nái jafnt til smærri sem stærri fjölmiðla. Aðeins þannig sé hægt að tryggja að sem flestar raddir heyrist í þjóðfélaginu. Lýðræðinu og tjáningarfrelsinu standi ógn af fákeppni á fjölmiðlamarkaði og því sé nauðsynlegt að jafnt sé gefið.

Áætlanir Frjálsrar fjölmiðlunar gera ráð fyrir að jafnvægi náist í rekstri félagsins fyrir árslok og segir Karl að flest bendi til þess að það markmið náist.