Fram til 2050 þarf að byggja nýjar virkjanir til að anna eftirspurn eftir raforku. Þörf er á byggingu virkjana sem svara til þriggja Blönduvirkjana. Þetta kemur fram í nýrri raforkuspá Orkustofnunar en spáin gildir fram til 2050. Í skýrslunni er fjallað um raforkunotkun fram til 2050 og spá um raforkunotkun frá 2015 endurreiknuð á grunni nýrra gagna og forsendna.

Fréttablaðið skýrir frá þessu í dag. Fram kemur að samkvæmt spánni muni afhending á rafmagni frá dreifikerfinu aukast um 80 prósent fram til 2050. Notkunin eykst um 2.800 gígavattsstundir í orku og 464 megavött í afli. Til samanburðar má nefna að Kárahnjúkavirkjun er 670 megavött en Blönduvirkjun er 150 megavött.

Ekki er gert ráð fyrir stórum og orkufrekum aðilum í spánni heldur er miðað við aukna raforkunotkun landsmanna.