Um 20 prósent háskólanema hefur notað örvandi efni sem þeir hafa orðið sér úti um án þess að hafa fengið lyfseðil fyrir þeim. Flestir nota lyfin til að reyna að geta einbeitt sér betur í prófaundirbúningi. Þetta kemur fram í nýrri könnun sem Jana Rós Reynisdóttir, deildarstjóri upplýsingadeildar Lyfjastofnunar, gerði. Hún segir þetta vera mikið áhyggjuefni enda sé ekki að ástæðulausu sem lyfjum sé ávísað til persónulegra nota.
Morgunblaðið skýrir frá þessu í dag. Fram kemur að nemarnir hafi sagt Jönu að algengast sé að þeir fái lyfin hjá einhverjum sem hefur fengið þau á löglegan hátt.
Í könnuninni sögðust 29 prósent nota lyfin til að bæta námsárangur og einbeitingu, 28 prósent sögðust eingöngu nota þau í prófaundirbúningi. Færri sögðust nota lyfin í afþreyingarskyni eða til að draga úr svefnþörf.