Héraðssaksóknari hefur ákært karlmann á Norðurlandi fyrir blygðunarsemisbrot, ærumeiðingar og hótanir gagnvart fyrrverandi sambýliskonu og barnsmóður. Meint brot áttu sér stað á árunum 2014 til 2015.

RÚV greinir frá þessu. Maðurinn er sakaður um að hafa birt mynd af konunni í ákveðnum Facebook-hóp, sem er ekki nefndur á nafn. Hann er sagður hafa birt þar nafn hennar, símanúmer og notendanafn hennar á Snapchat. Hann ku hafa tekið sérstaklega fram að hann ætti myndbönd af henni ef einhver hefði áhuga á því.

Maðurinn er auk þess sakaður um að hafa sent konunni samtals 16 ógnandi smáskilaboð, þar á meðal mynd af byssutösku. Með þeim skilaboðum fylgdi eftirfarandi textabútur: „Þú veist að þetta kemur með. Þú fokkaðir mér upp og mun rústa þér.“

Samkvæmt frétt RÚV er maðurinn enn fremur ákærður fyrir stórfelldar ærumeiðingar með því að senda henni smáskilaboð sem bæði móðguðu hana og smánuðu. Þingfesting átti að fara fram í Héraðsdómi Norðurlands eystra í dag en var frestað.