Bannað verður að nýskrá dísel- og bensínbifreiðar eftir árið 2030. Þetta er meðal þess sem kemur fram í aðgerðaráætlun ríkisstjórnarinnar í loftslagsmálum. Fram kemur að kannaðir verði möguleikar á undanþágum í sérstökum tilfellum, s.s. út frá byggðasjónarmiðum. Segir í aðgerðaráætluninni að þessi aðgerð sé ekki síst mikilvæg vegna þeirra skilaboða sem í henni felst fyrir bílaframleiðendur.
Aðgerðaráætlunin miðar að því að Ísland geti staðið við skuldbindingar sínar samkvæmt Parísarsamkomulaginu í loftslagsmálum. 6,8 milljörðum króna verður varið til sérstakra aðgerða í loftslagsmálum á næstu fimm árum en það er margföldun miðað við undanfarin ár.
Aðgerðirnar eru í fjórum flokkum. Fyrstu tveir flokkarnir geyma tillögur að aðgerðum sem eiga að stuðla að orkuskiptum, annars vegar í samgöngum og hins vegar á öðrum sviðum. Þriðji flokkurinn fjallar um aðgerðir til að efla kolefnisbindingu í gróðri og jarðvegi. Fjórði flokkurinn snýr að margvíslegum aðgerðum á öðrum sviðum, þar á meðal minni sóun og bætta meðferð úrgangs, aukna fræðslu, stuðning við nýsköpun og loftslagsvæna tækni, loftslagsstefnu Stjórnarráðsins og aðgerðir í landbúnaði og iðnaði.
Styrkja á almenningssamgöngur með heildstæðum hætti með það að markmiði að fjölga farþegum og nota umhverfisvæna vagna. Segir í aðgerðaráætluninni að ráðist verði í uppbyggingu innviða, bæði samgöngumiðstöðva og forgangsakreina þar sem það á við.
Ríkið á að verða leiðandi í samfélaginu þegar kemur að hlutfalli visthæfra bíla og þeim verði fjölgað eins hratt og mögulegt er, m.a. með kröfum um að ætíð skuli kaupa rafbíl eða visthæft ökutæki við endurnýjun.
Fram að því að bannað verði að nýskrá bensín- og díselbíla verður stefnt að því að losun frá vegasamgöngum minnki um rúmlega 35% til 2030 miðað við 2005, þannig að hún verði um 500 þús. tonn árið 2030. Segir í aðgerðaráætluninni að losun frá vegasamgöngum gæti að óbreyttu mögulega náð allt að milljón tonnum af CO2 í ár, svo þetta þýddi um helmings minnkun á losun.
Reiknað er með að þessu markmiði verði náð einkum með stórauknu hlutfalli rafbíla og annarra vistvænna ökutækja í bílaflotanum. Nú eru um 280.000 skráðar bifreiðar á Íslandi, en nýskráningar eru um 10-20.000 bílar á ári. Stefna ætti að því að hækka til muna hlutfall rafbíla og annarra vistvænna ökutækja, þannig að þeir verði a.m.k. um 100.000 árið 2030.
