„Við fengum hringingu frá leikskólanum um hálf fjögur leytið í gær þess efnis að hann hefði fundið poka með hvítu dufti á leikskólalóðinni og sett það upp í sig. Ég hljóp upp í leikskóla og hafði samband við eitrunarmiðstöð Landspítala og þar var okkur ráðlagt að fara upp á Barnaspítala,“ segir Kristinn Ólafur Smárason í samtali við DV.
Kristinn er faðir fimm ára drengs sem fann poka sem innihélt amfetamín á leikskólalóð Fagrabrekku í Kópavogi í gær. Í samtali við DV segir Kristinn að þegar hann kom upp í leikskóla hafi sem betur fer ekkert virst ama að drengnum en þeir þó farið rakleitt upp á spítala þar sem pilturinn gekkst undir rannsóknir, tekið var hjartalínurit og þvagprufa til dæmis.
Ekkert kom út úr þessum rannsóknum og því virðist sonur Kristins sem betur fer ekki hafa sett nægilegt magn upp í sig til að efnið mældist í honum. Meðan Kristinn og sonur hans voru á Barnaspítalanum kom lögreglan og tók efnið með sér til greiningar. Um klukkustund síðar lágu niðurstöðurnar fyrir þess efnis að um amfetamín hefði verið að ræða.
Ekki þarf að fjölyrða um það hversu illa hefði getað farið ef drengurinn hefði tekið of stóran skammt af efninu.
Kristinn segir að það hafi jafnvel verið lán í óláni að sonur hans hafi fundið amfetamínið og farið með það til leikskólakennarans en ekki einhver yngri og með minna vit. Fór pilturinn með það til kennarans til að fá vatnssopa þar sem amfetamínið var svo vont á bragðið.
Í samtali við DV segir Kristinn að hann sé búsettur nærri leikskólanum og sjái yfir lóðina. Að undanförnu hafi hann tekið eftir fólki á lóðinni sem virðist vera einhverskonar samkomustaður fyrir fólk sem er löngu útskrifað úr leikskóla, eins og hann orðar það.
Kristinn tekur skýrt fram að ekki sé við starfsfólk leikskólans að sakast; það gangi um leikskólalóðina alla morgna til að passa að óæskilegir hlutir séu ekki á lóðinni þar sem börnin eru að leik.
Kristinn segist þakklátur fyrir að syni hans hafi ekki orðið meint af og hvetur foreldra til að brýna fyrir börnum sínum að láta það vera að snerta hluti sem þau finna úti á götu. Segist Kristinn að lokum ætla að hringja á lögregluna næst þegar hann sér fólkið sem hengur á leikskólalóðinni á kvöldin. Þá kveðst hann að lokum vilja þakka starfsfólki Fögrubrekku fyrir snör og rétt viðbrögð sem og starfsfólki Barnaspítala Hringsins sem tók vel á móti þeim feðgum í gær.