Björgólfur Jóhannsson er hættur sem forstjóri Icelandair. Hann tilkynnti þetta í gærkvöldi í kjölfar nýrrar afkomuspár félagsins en hún lækkaði frá því sem áður var. Í tilkynningu er haft eftir Björgólfi að ákvarðanir hans hafi valdið félaginu fjárhagslegu tjóni og hann beri ábyrgð á því gagnvart stjórn félagsins og hluthöfum. Bogi Nils Bogason, fjármálastjóri Icelandair, tekur tímabundið við forstjórastarfinu þar til stjórnin hefur ráðið nýjan forstjóra.
Í tilkynningu er haft eftir Björgólfi að þó búið sé að taka á þeim vandamálum sem hafa leitt til verri afkomu Icelandair þá sé það ábyrgðarhluti að breytingunum hafi ekki verið fylgt eftir með fullnægjandi hætti og að hafa ekki brugðist fyrr við. Þá ábyrgð telji Björgólfur rétt að axla og láti því af störfum sem forstjóri félagsins.
