1.044 fóstureyðingar voru framkvæmdar á Íslandi á liðnu ári, en þetta er aðeins í annað sinn sem fóstureyðingar fara yfir þúsund hér á landi. Það gerðist síðast árið 2016 þegar 1.021 fóstureyðing var framkvæmd.

Þetta kemur fram í Morgunblaðinu í dag en vísað er í tölur frá Landæknisembættinu.

Þar kemur fram að flestar þeirra kvenna sem fóru í fóstureyðingu voru á aldrinum 20-29 ára, eða 552 talsins. Tvær voru ekki orðnar fimmtán ára og sex voru 45 ára eða eldri.

Þá kemur fram að fjöldi fóstureyðinga á hverjar 100 þunganir, samanlagðan fjölda fæðinga og fóstureyðinga, var 20,4 og hefur hann ekki verið meiri.

Loks er sagt frá því að mun fleiri karlar en konur hafi gengist undir ófrjósemisaðgerð í fyrra, eða 542 á móti 96. Hefur ófrjósemisaðgerðum karla fjölgað mjög á undanförnum árum á meðan ófrjósemisaðgerðum hjá konum hefur fækkað.