„Eitthvað virðist þó hylla undir breytta tíma þegar helgin rennur sitt skeið. Langtímaspár eru a.m.k. að gera ráð fyrir að lægðabrautin verði sunnar í Atlantshafinu. Það myndi hafa í för með sér austlægar áttir og allt annað veðurfar. Betra veður fyrir sólarþyrsta íbúa á vestanverðu landinu, en síðra veður fyrir austan. Enn er þó nokkuð óljóst hvernig þetta mun allt saman spilast og því skal væntingum haldið í skefjum enn um sinn.“
Þetta segir í hugleiðingum veðurfræðings á vef Veðurstofu Íslands. Þar er réttilega bent á að suðvestanáttin hafi verið þrálát það sem af er sumri og mun hún halda velli út vikuna hið minnsta, með vosbúð sunnan- og vestanlands en góðu veðri norðan- og austanlands, hlýindum og bjartviðri.
„Er spáin að minnsta kosti svohljóðandi fram á laugardag og óþarfi að hafa mörg orð um það mynstur, enda höfum fengið fjölmörg sýnidæmi að undanförnu.“
Samkvæmt langtímaspá norsku veðurstofunnar, á vefnum yr.no, má vissulega búast við bjartviðri í Reykjavík eftir helgi. Ef sú spá gengur eftir fer að létta til á sunnudagskvöld og á mánudag verður heiðskýrt og 12 stiga hiti. Á þriðjudag er gert ráð fyrir 14 stiga hita og sól – ekki ský á himni þann daginn.
En gamanið tekur enda á miðvikudag þegar fer að þykkna upp að nýju á höfuðborgarsvæðinu. Þá tekur við kunnuglegt stef; rigning og hiti á bilinu 9-11 stig í sunnanátt. Spáin nær til fimmtudags í næstu viku og þann daginn verður sólin ekki áberandi þann daginn; alskýjað og hiti á bilinu 9-11 stig.
Niðurstaðan er því þessi: Þið sem búið á höfuðborgarsvæðinu getið (kannski) farið að hlakka til sumarsins. Ef allt gengur eftir kemur sumarið í næstu viku, í tvo daga (vonandi).