Davíð Þór Jónsson prestur í Laugarneskirkju var harðorður í Morgunútvarpinu á Rás 2 í morgun. Gekk Davíð þór það langt að Sigmar Guðmundsson þáttastjórnandi spurði hvort Davíð væri ekki undir lok viðtalsins að ganga of langt í ásökunum og í orðum hans væri jafnvel að finna ærumeiðingar. Davíð Þór var ekki sammála slíku.
„Hún fær hvorki afsökunarbeiðni né krónu frá mér í skaðabætur frá mér fyrir að segja þessi þrjú orð: „Arnþrúður er full“,“ sagði Davíð Þór sem átti eftir að kveða enn fastar að orði.
Þetta er ekki í fyrsta sinn sem Davíð Þór rekur hornin í Útvarp Sögu og stjórnendur þeirra. Hefur Davíð Þór oftar enn einu sinni haldið fram að á Útvarpi Sögu sé rekinn hatursáróður og þar sé dreift lygum og rógi. Þá vakti athygli þegar Davíð Þór var í viðtali á Útvarpi Sögu fyrir forsetakosningar þegar hann hugði sjálfur á framboð og átti hann í hörðum orðaskiptum við þáttastjórnendur sem endaði með því að hann sleit samtalinu. Þá viðurkenndi Davíð Þór að hafa misst stjórn á sér og sá hann eftir því. Í viðtalinu í Morgunútvarpinu gekk Davíð Þór þó mun lengra en áður en ósættið nú má rekja til þess að Davíð samdi texta fyrir væntanlega plötu pönkhljómsveitarinnar Austurvígstöðvarnar þar sem sungið er um að Arnþrúður sé full og Davíð Þór æli þegar opnað er fyrir símann svo hlustendur geti tjáð sig.
Þá segir Davíð að Útvarp Saga sé brjálæðingshæli þar sem lýst er yfir aðdáun á fasisma og öllu fórnað fyrir föðurlandið með fávitaskap og rasisma. „Og áfram mallar hið illgjarna bull, því Arnþrúður er full.“
Arnþrúður hefur lýst því yfir að hún snerti ekki áfengi og var brugðið á það ráð að efna til könnunar á Útvarpi Sögu þar sem spurt var hvort hlustendur væru ánægðir með að Davíð Þór hefði verið kosinn sóknarprestur í Laugarneskirkju. Niðurstaðan í dag er að 76 prósent hlustenda eru á móti. Útvarp Saga hefur einnig grafið upp gömul ummæli Davíðs þar sem hann á að hafa úthúðað þeim sem börðust gegn unglingadrykkju á útihátíðinni Uxa´95. Davíð Þór hefur bæði hlotið hól og last fyrir textann en Börkur Gunnarsson varaborgarfulltrúi Sjálfstæðismanna þykir öfugsnúið að prestur sem þiggur laun frá ríkinu sé að níða niður fólk „sem sé að berjast í bökkum í einkageiranum. Þegar þeir sem eru innangarðs hjá valdinu nota pönk til að níðast á þeim sem eru utangarðs. Þá er allt komið á hvolf.“
Davíð Þór tjáði sig svo um málið í Morgunútvarpinu. Þar gekk Davíð Þór lengra enn áður í gagnrýni sinni og virtist þáttastjórnandanum Sigmari Guðmundssyni nokkuð brugðist undir lok viðtalsins.
Þetta er harkalega ort, hvers vegna gengurðu svona hart fram?
„Af því að það hæfir tilefninu. Þegar maður er að yrkja ljóð eða söngtexta, þá setur maður sig í stellingar sem hæfa tónlistinni sem verið er að syngja. Þetta er söngtexti með pönk-hljómsveit, þar sem tónlistin er óhefluð og hrá. Mér finnst að textinn eigi að vera það líka. Það passar ekki að syngja einhverja innhverfa væmni yfir dynjandi rafmagnsgítar. Það þarf að vera í takt við músíkina.“
Einhvers staðar eiga nú að vera mörk, er það ekki?
„Er það? Eigum við að setja reglur um það að listrænt frelsi manna verði að setja mörk? Er ekki frjáls sköpun, er það ekki grundvallarregla í frjálsu samfélagi? Mér fannst bara full ástæða til að draga hvergi undan og eina sem ég segi í þessum söngtexta, sem ég get ekki beinlínis sannað með staðreyndum er hvort Arnþrúður sé full. Allt annað sem kemur fram er bara, að vísu með óhefluð orðbragði, þá er ekkert fullyrt sem er ekki bláköld staðreynd. Eins og að Útvarp Saga sé massív áróðursstöð fyrir hatursáróður. Þar er dreift lygum og ósannindum um hælisleitendur, jafnvel vísvitandi.“
Þá benti Sigmar á að viðbrögð Útvarps Sögu hefðu verið hörð á móti og Pétur Gunnlaugsson velti fyrir sér hvort það væri búið að breyta kirkjunni í kirkju Satans. Upplýsti Sigmar að Pétur hefði kallað eftir því að Davíð yrði rekinn.
„Ég þakka honum kærlega fyrir þetta, því þetta var okkur hugljómun því allt í einu kom nafnið á plötuna til okkar. Hún mun heita Útvarp Satan. […] Þetta vil ég segja tvennt, fasismi er aðferðafræði. Pétur er rosalega móðgaður yfir því að ég segi að á Útvarp Sögu sé lýst yfir aðdáun á fasisma. Það er samt enginn vafi á því að það er lýst yfir aðdáun á aðferðafræði fasismans. Hluti af aðferðafræði fasisma er svokallað berufsverbot, sem lýsir sér í því að fólki er gert ókleift að vinna störf sem það hefur menntun og hæfileika til, vegna skoðana sinna. […] Mér finnst óneitanlega mjög kaldhæðið að viðbrögðin við því að vera sakaður um fasisma sé að fá þann sem setur ásökunina fram í berufsverbot.“
„Í öðru lagi þá þykir mér svolítið kaldhæðið að ég sé á þessari útvarpsstöð sakaður um eiturlyfjaneyslu, kallaður sýruhaus. Arnþrúður Karlsdóttir kemur sjálf á síðu þessarar hljómsveitar og kommenterar eitthvað á þá leið að þessi hljómsveit sé að safna fyrir dópi. […] Ég er sakaður um massíva framleiðslu á klámi og gott ef ekki barnaklámi. Þetta er sagt á Útvarpi Sögu. […] Á milli þessa er talað um að það eigi að fara í meiðyrðamál við mig, fyrir að fullyrða að Arnþrúður sé full, sem note bene er ekki saknæmt athæfi. Mér finnst það svolítið skrýtið.“
Fari hún í meiðyrðamál við þig, myndir þú fara í meiðyrðamál á móti?
„Ég veit það ekki, ég nenni ekki að hlusta á þetta, en henni er guðvelkomið að fara í öll þau meiðyrðamál við mig sem hún hefur getu og nennu til að fara í,“ sagði Davíð þá. „Hún fær hvorki afsökunarbeiðni né krónu frá mér í skaðabætur frá mér fyrir að segja þessi þrjú orð: „Arnþrúður er full“.“
Þá sagði Davíð Þór einnig:
„Það þarf eitthvað mikið að gerast til að ég nenni að fara í málaferli sjálfur vegna þess að það þýðir í fyrsta lagi að ég þarf að gefa þessu tíma og athygli og gefa þessu fólki stærri hluta af lífi mínu en það er nú þegar búið að leggja undir sig með hávaða og frekju. Þó ég fengi Arnþrúði Karlsdóttur dæmda til að greiða skaðabætur þá myndi hún bara svíkja þann pening af einhverri andlega fatlaðri manneskju líkt og hún gerir þegar hana vantar peninga.“
Þetta er ekki fallega sagt
„Gúgglaðu: „Arnþrúður Karlsdóttir svíkur öryrkja“. Þá sérðu á hvaða level hennar fjármál og fjármálasiðferði er.“
Gæti þetta ekki verið ærumeiðing?
„Það gæti verið það, en getur varla verið mikil ærumeiðing að lesa blaðagrein sem birtist á Vísi í nóvember síðastliðnum,“ sagði Davíð Þór að lokum áður en Sigmar sleit samtalinu.
