Slagsmál brutust út í strætisvagni laugardagskvöldið 8. júlí, í þýsku borginni Bremen. Atvikið átti sér stað eftir að fjórar mæður með barnavagna gátu ekki komið sér saman um hvar koma ætti vögnunum fyrir.
Ein konan hringdi í eiginmann sinn og bróður hans sem mættu á svæðið en þá hafði lögreglan einnig verið kölluð til. Á þessari stundu var eiginkonan í slagsmálum við hinar þrjár en lögreglan reyndi að halda bræðrunum frá.
Kalla þurfti til fleiri lögreglumenn á svæðið eftir að eiginmaðurinn réðist á lögregluþjón og bróðir hans kýldi lögreglukonu. Bræðurnir voru sturlaðir af reiði og kölluðu lögregluþjónana „tíkarsyni“.
Um 50 manns söfnuðust í kring til að fylgjast með slagsmálunum og mikinn fjölda lögregluþjóna þurfti til að halda fólki í skefjum. Þegar rykið settist lágu þrír lögreglumenn særðir eftir og bræðurnir tveir voru fluttir í fangageymslur. Þeir hafa verið kærðir fyrir líkamsárás og brot gegn valdsstjórninni.