Þeim fjölgar þó sem eru óánægðir með störf hans
Ánægja landsmanna með störf Guðna Th. Jóhannessonar, forseta Íslands, mælist nú 81,1 prósent og hefur minnkað aðeins frá því að hún náði hámarki. Hún mældist 85 prósent í apríl og 83,9 prósent í maí. Þetta er samkvæmt nýrri könnun MMR.
Í frétt MMR segir að óánægja landsmanna með störf Guðna Th. sem forseta Íslands hafi aukist frá síðustu mælingu. Þar kom í ljós að 5,1 prósent sögðust óánægðir með störf forsetans samanborið við 2,8 prósent í síðustu mælingu.
Fleiri konur en karlar sögðust vera ánægðar með störf forsetans, eða 86 prósent, samanborið við 77 prósent karla.
Þá mátti sjá að ánægja með störf Th. Jóhannessonar reyndist mismunandi þegar horft var til stuðnings til stjórnmálaflokka. Mest var ánægjan með störf forsetans hjá stuðningsfólki Samfylkingarinnar, eða 96 prósent. Stuðningsfólk Framsóknar- (64%) og Sjálfstæðisflokksins (68%) reyndust almennt ekki vera jafn ánægt með störf forsetans og stuðningsfólk annarra flokka.
Til samanburðar frá síðustu mælingum í apríl 2017 reyndust stuðningsfólk Pírata og Vinstri grænna sá flokkur sem ánægðastir voru með störf forsetans, jafnir með 95%.
974 einstaklingar svöruðu könnun MMR sem var framkvæmd dagana 6. til 14. júní.