Á fyrsta tímanum í nótt var lögreglunni á höfuðborgarsvæðinu tilkynnt um heimilisofbeldi og líkamsárás í heimahúsi í vesturhluta Reykjavíkur. Gerandinn var fluttur á lögreglustöð þar sem rætt var við hann. Hann var síðan látinn laus.

Á fjórða tímanum í nótt var tilkynnt um mann sem væri að lemja og berja á heimahús í Hafnarfirði. Þarna var maður að reyna að komast inn hjá fyrrverandi unnustu sinni. Þegar lögreglumenn komu á vettvang hljóp maðurinn af vettvangi en fótfráir lögreglumenn hlupu hann uppi og handtóku hann. Maðurinn var vistaður í fangageymslu.

Einn ökumaður var handtekinn í nótt, grunaður um akstur undir áhrifum fíkniefna.

Um miðnætti höfðu lögreglumenn afskipti af tveimur mönnum sem voru í bíl í Kópavogi. Mikla kannabislykt lagði frá bílnum. Við leit í bílnum fundust ætluð fíkniefni. Málið var afgreitt á vettvangi.