Fjölskyldumaður á höfuðborgarsvæðinu fékk ánægjulegt símtal frá Getspá síðasta mánudag þegar honum var tilkynnt að hann hafi unnið rúmlega 46,5 skattfrjálsar milljónir á miðann sem hann hafði keypt sér á lotto.is.
Þetta kemur fram í tilkynningu frá íslenskri getspá. Þar segir að vinningshafinn hafi ekki vitað af vinningum.
„ …. og því var gleðin mjög mikil enda maðurinn með stóra fjölskyldu og hefur verið að vinna í endurbótum á eigin húsnæði sem nú var komið stopp á en þessi vinningur breytir því að nú er hægt að halda áfram að uppbyggingu húsnæðisins.“
Þá segir einnig í tilkynningunni:
„Einnig eru margir aðrir útgjaldapóstar fyrir fjölskylduna sem vinningurinn léttir undir með, til dæmis tannréttingar, ferming, íþróttir svo eitthvað sé nefnt. Fjölskyldan ætlar að halda áfram með endurbætur á húsnæðinu og jafnvel að leyfa fjölskyldunni að fara allri saman erlendis í frí en það hefur hún aldrei getað veitt sér fyrr.“