Í Lögbirtingablaðinu kemur fram að lýstar veðkröfur námu 65 milljónum króna í félag Guðmundar Jörundssonar.
Gjaldþrot íslenska tískumerkisins JÖR nam ríflega 65 milljónum króna. Guðmundur Jörundsson er hönnuðurinn bak við merkið og einn eigenda félagsins. Greint var frá skiptalokum í Lögbirtingablaðinu í dag þar sem kemur fram að lýstar veðkröfur hafi numið 65,3 milljónum króna. Upp í lýstar kröfur fengust greiddar 1,6 milljónir króna. Skiptastjóri hafnaði lýstri vefkröfu að fjárhæð ríflega 46 milljónum króna. Lýstar forgangskröfur námu 13,9 milljónum króna og fékkst ekkert greitt upp í þær. Lýstar almennar kröfur námu 24,5 milljónum króna og fékkst ekkert greitt upp í þær. Skiptum búsins lauk 9. maí síðastliðinn.
Félagið sem hélt jafnframt utan um verslun á horninu á Skólavörðustíg og Týsgötu. Um síðustu mánaðamót vakti það athygli að búðin var tóm og hefur engin starfsemi verið þar síðan þá. Í viðtali við Morgunblaðið í nóvember greindi Guðmundur frá því að miklar framkvæmdir stæðu fyrir í húsnæðinu. „Það er búin að fara mikil vinna í það verkefni en miklar framkvæmdir liggja fyrir á rýminu, undanfarnir mánuðir hafa því farið í að meta og hanna húsnæðið sem og gerð allra teikninga og upplýsinga sem byggingarfulltrúi krefst,“ var haft eftir Guðmundi.