Georgina Callander, 16 ára stúlka og einlægur aðdáandi bandarísku poppstjörnunnar Ariana Grande, var meðal þeirra tuttugu og tveggja sem létust í sprenginunni í Manchester Arena í gærkvöldi. Voðaverkið var framið eftir tónleika Grande í borginni og segir lögregla að um hryðjuverk hafi verið að ræða.

Auk þeirra 22 sem létust slösuðust 59 þegar árásarmaðurinn sprengdi sig í loft upp að tónleikum loknum. Sprengingin varð á svæði milli tónleikahallarinnar og lestarstöðvar sem liggur upp við tónleikahöllina. Fjölmargir urðu vitni að atvikinu.

Georgina er fyrsta fórnarlamb árásarinnar sem er nafn- og myndbirt í breskum fjölmiðlum. Hún var einlægur aðdáandi Grande og hitti hana meðal annars fyrir tveimur árum og sat fyrir á mynd með henni. Áður en að tónleikunum í gærkvöldi kom hafði hún lýst því yfir á Twitter hversu spennt hún væri að sjá átrúnaðargoð sitt.

Náinn vinur Georginu sagði við Evening Standard að hún hefði látist skömmu eftir komuna á sjúkrahús með móður sína sér við hlið. Fjölmargir vinir hennar minntust skemmtilegrar og góðhjartaðrar stúlku. „Hvíldu í friði, Gina. Ég elska þig svo ótrúlega mikið. Ég er svo heppin að hafa þekkt þig,“ sagði ein vinkona hennar á meðan önnur bætti við: „Falleg stúlka með fallega sál og fallegt hjarta. Ég mun sakna þín.“

Rannsókn lögreglu á málinu stendur nú yfir af fullum þunga og beinist rannsóknin meðal annars að því hvort árásarmaðurinn hafi verið einn að verki eða hluti af stærra neti hryðjuverkamanna. Þegar þetta er skrifað hefur enginn lýst ábyrgð á ódæðinu en eftir að fregnir af voðaverkinu spurðust út fögnuðu stuðningsmenn ISIS á samskiptamiðlum.

Lögregla fer nú yfir upptökur úr öryggismyndavélum í nágrenninu í þeirri von að varpa ljósi á ferðir árásarmannsins áður en hann sprengdi sig í loft upp.