Eirik Jensen er sagður hafa tekið óbeint þátt í smygli á fjórtán tonnum af hassi til Noregs
Saksóknarar í Noregi hafa farið fram á það að Eirik Jensen, fyrrverandi norskur lögreglumaður, verði dæmdur í 21 árs fangelsi fyrir stórfellda spillingu meðan hann gegndi starfi yfirmanns deildar sem átti að berjast gegn skipulagðri glæpastarfsemi.
Eirik, sem er 60 ára, hefur verið ákærður fyrir að láta það ógert að stöðva smygl á alls fjórtán tonnum af hassi til Noregs á árunum 2004 til 2013.
Í stað þess að berjast gegn skipulagðri glæpastarfsemi slóst hann í lið með mönnum sem stunda slíka starfsemi. Hann er sagður hafa þegið 2,44 milljónir norskra króna, hátt í 30 milljónir íslenskra króna á núverandi gengi, frá glæpamönnunum, Gjermund Cappelen þar á meðal sem talinn er hafa haft veg og vanda að smyglinu.
Jensen hefur neitað sök í málinu en saksóknarar telja sig hafa næg gögn í höndunum til að sakfella hann. Þar á meðal eru afrit af samskiptum Eiriks og Gjermunds. Upp komst um málið þegar Gjermund var handtekinn vegna gruns um smygl. Í viðleitni sinni til að sleppa með vægari refsingu sagði hann til Eiriks og varpaði ljósi á meintan þátt hans í smyglinu.
Saksóknarar hafa farið fram á að Gjermund verði dæmdur í 18 ára fangelsi en vilja að Eirik verði dæmdur til þyngri refsingar, sem fyrr segir. Málið er nú fyrir dómstólum í Noregi og má búast við að dómur falli í sumar.
Sambærilegt mál kom upp í Finnlandi ekki alls fyrir löngu þegar fyrrverandi lögregluþjónn í fíkniefnadeild lögreglunnar í Helsinki var ákærður og sakfelldur fyrir þátt sinn í eiturlyfjasmygli. Sá var dæmdur í 10 ára fangelsi.