Bandarísk yfirvöld hafa komist að samkomulagi um bótagreiðslu vegna dauða sextán ára pilts frá Mexíkó, Cruz Marcelino Acevedo, sem lést þann 18. nóvember 2013 á landamærum Bandaríkjanna og Mexíkó.
Þannig var mál með vexti að pilturinn var á leið til Bandaríkjanna þegar bandarískir tollverðir stöðvuðu hann. Í bakpoka hans fundust tvær krukkur af fljótandi efni sem vöktu grunsemdir tollvarða. Pilturinn svaraði á þá leið að í krukkunum væri appelsínusafi en síðar kom á daginn að um var að ræða stórhættulegt fíkniefni, metamfetamín í fljótandi formi.
Tollverðirnir tveir sem höfðu afskipti af piltinum, Adrian Perallon og Valerie Baird, sögðu þá við drenginn að hann skyldi fá sér sopa af drykknum til að sanna að um appelsínusafa væri að ræða – þó þeir hefðu mátt vita að innihaldið væri annað.
Drengurinn vildi að sjálfsögðu komast hjá því að verða handtekinn og brá því á það ráð að fá drekka innihaldið og er hann sagður hafa tekið fjóra sopa.
Acevedo var fluttur lífshættulega veikur á sjúkrahús í kjölfarið þar sem hann lést tveimur klukkustundum síðar af völdum of stórs skammts af fíkniefnum.
Lögmaður fjölskyldunnar, Eugene Iredale, segir að flest bendi til þess að Acevedo hafi verið burðardýr og flutt efnin til Bandaríkjanna gegn smávægilegri þóknun.
Samkomulagið felur í sér að bandaríska toll- og landamæravarslan greiðir fjölskyldu Acevedo eina milljón dala í bætur, rúmar 110 milljónir króna.