Sylvía Rut Sigfúsdóttir hefur verið ráðin ritstjóri tímaritsins Nýtt Líf. Hún mun einnig sjá um ýmis önnur verkefni tengd tímaritum Birtíngs. Þetta kemur fram á Pressunni.
Sylvía Rut hefur ritstýrt Bleikt frá árinu 2014 og einnig Pressunni frá því á síðasta ári en lætur nú af þeim störfum. Sylvía Rut tekur við sem ritstjóri Nýs Lífs af Ernu Hreinsdóttur, sem lét af störfum um síðustu áramót, og hefur störf á næstu dögum.
Sylvía Rut hefur starfað hjá Pressunni frá því í júní 2013 en fyrirtækið hefur, eins og kunnugt er, fest kaup á öllu hlutafé í Birtingi og tekur nú við útgáfu á tímaritum fyrirtækisins.
Segir Sylvía að hún sé spennt að takast á við nýtt verkefni.
„Nýtt Líf er tímarit sem á sér langa og áhugaverða sögu en fyrsta tölublaðið kom út árið 1978. Það verður skemmtilegt að halda áfram að þróa þetta tímarit og kynna fyrir lesendum spennandi nýjungar.“