Smári McCarthy þingmaður Pírata átti fyrir stuttu í deilum vegna komu trúarbragðafræðingsins Robert Spencer til landsins. Spencer er umdeildur vegna skoðana sinna á Íslam en hann telur að Íslamistar séu að reyna að eyðileggja vestræn samfélög innan frá og uppsprettu illvirkja íslamskra hryðjuverkamanna sé að finna í trúarritum múslima og fordæmi Múhammeðs spámanns.
Fyrirlestur Spencers var vel sóttur en mjög margir voru óánægðir með komu hans hingað til lands og var efnt til mótmæla fyrir utan fyrirlestrarsalinn. Andstæðingar Spencers hér á landi saka hann um fordóma gegn múslimum og margir gengu svo langt að kalla Spencer nasista.
Núna er rykið farið að setjast lítið eitt eftir þetta moldviðri en eftir standa áhugaverð skoðanaskipti á samfélagsmiðlum um hinn umdeilda gest.
Einn af þeim sem blönduðu sér í umræðuna voru Smári McCarthy, þingmaður Pírata. Hann lenti í stuttri en skemmtilegri rimmu við Sigurfrey Jónasson, stjórnarmann í Vakri, félaginu sem stóð að komu Spencers til landsins. Smári sveiflaði brandi orðsins fimlega í þessu skemmtilega innleggi:
„Vilji maður vita eitthvað um hvað sem er – hvort sem það er íslam, blómaskreytingar, flugvélahönnun eða sögu Berufjarðar – er sennilega betra að lesa bók eftir einhvern sem hefur þekkingu á því sviði en að hlusta á reiðilestur manns sem hefur engan áhuga á að setja hlutina í rétt samhengi eða miðla raunverulegri þekkingu.“
19 manns lækuðu þetta vel stílaða innlegg Píratans sem þó átti ekki eftir að standa birt nema stutta stund á Facebook.
Sigurfreyr svarar innlegginu og spyr hvort Smári sé með rökstuðning fyrir þessari lýsingu á Robert Spencer.
Ekki stóð á svari hjá Smára sem deildi fjölda innleggja þar sem fjallað er um vafasaman málflutnings Spencers.
Smára var hins vegar bent á að maðurinn sem hann væri að fjalla um væri ekki Robert Spencer heldur maður að nafni Richard Spencer, þekktur bandarískur hægri öfgamaður sem sakaður er um daður við kynþáttahyggju.
Smári eyddi innleggjunum en setti inn önnur þar sem kvað við þann tón að þrátt fyrir þessi mistök væri Robert Spencer óalandi og óferjandi.
Hér verða ekki bornar saman skoðanir Richard Spencers og Robert Spencers en hafsjór af efni er til um báða mennina á veraldarvefnum. Þeir eru hins vegar gjörólíkir í útliti enda töluverður aldursmunur á þeim, Richard Spencer er 39 ára en Robert Spencer er 55 ára.