„Ég hef sannfærst um það með því að fylgjast með okkar samfélagi og þessum hagsmunaöflum sem við erum að tala um að það sé bara til eitt afl á Íslandi sem ræður við þau. Það er fólkið í landinu með sínu atkvæði,“ segir Styrmir Gunnarsson í viðtali í helgarblaði DV þar sem meðal annars er rætt um baráttu hagsmunaafla.
„Frá árinu 1997 skrifaði ég í nafni Morgunblaðsins um beint lýðræði þar til ég hætti og hef síðan haldið því áfram sjálfur undir mínu eigin nafni. Þetta byggist á þeirri sannfæringu að hið beina lýðræði sé eina aflið sem ræður við alla þessa mismunandi hagsmunahópa í samfélaginu, hvort sem það er landbúnaður, sjávarútvegur, verslun, viðskipti, bankar og svo framvegis,“ segir Styrmir.
„Mér finnst að það eigi að breyta stjórnskipun Íslands þannig að þjóðin sjálf taki allar meginákvarðanir í þjóðaratkvæðagreiðslu og þingið útfæri síðan þær ákvarðanir í löggjöf. Þannig finnst mér að eigi að stjórna Íslandi og ég er algjörlega sannfærður um að þetta er eina leiðin til að skapa hér sæmilega sanngjarn og réttlátt samfélag. Stjórnmálamennirnir og flokkarnir ráða ekki við þessi hagsmunaöfl.“