Sögð hafa kynnst í brúðkaupi á Suðurlandi um síðustu helgi
Bandaríska leik- og söngkonan Lindsay Lohan er komin með íslenskan kærasta, samkvæmt heimildum DV. Lindsay er nýfarin af landi brott eftir að hafa verið viðstödd brúðkaup vina sinna, Olivers Luckett og Scotts Guinn, sem gengu í hjónaband á Suðurlandi þann 17. júní síðastliðinn.
Samkvæmt heimildum DV hafa Lindsay og íslenski pilturinn, sem er rúmlega tvítugur að aldri, sést talsvert saman að undanförnu en þau munu hafa kynnst í brúðkaupi Olivers og Scotts og náð strax vel saman. Lindsay fór af landi brott í vikunni eftir vel heppnaða dvöl á Íslandi.
Lindsay er nokkrum árum eldri en íslenski pilturinn. Hún er fædd árið 1986 og verður 31 árs um næstu helgi. Má leiða að því líkum að hann heimsæki hana þegar hún fagnar afmæli sínu.
Lindsay Lohan hóf söng- og leiklistarferil sinn þegar hún var 10 ára. Hún var sannkölluð barnastjarna í Hollywood og lék til að mynda í myndunum The Parent Trap, Freaky Friday og Mean Girls. Minna hefur þó farið fyrir henni á leiklistarsviðinu í seinni tíð.