Reykjavík Foods framleiðir afurðir úr hágæða hráefni
Nýlega setti Reykjavík Foods sínar fyrstu vörur á markað, hægeldaðan lax í dós, en fyrirtækið sérhæfir sig í að búa til afurðir úr hágæða íslensku hráefni. Af því tilefni var boðið til fagnaðar á Bryggjunni brugghúsi, Grandagarði þar sem gestum var boðið upp á að smakka dýrindis útgáfur af laxinum.
„Fyrirtækið var stofnað fyrir ári,“ segir Þórdís Jóhannsdóttir Wathne, framkvæmdastjóri Reykjavík Foods. „Í þessari fyrstu vörulínu er notast við hágæða lax frá Vestfjörðum sem er bragðbættur með hreinum náttúruafurðum eins og basilíku, hvítlauk, trufflum og sjávarsalti frá Saltverki. Við byrjum með hreinan lax, lax með hvítlauki og basil, lax með trufflum og reyktan lax.“
Vörur Reykjavík Foods hafa fengið mjög góðar viðtökur og fór svo að fyrsta sending í verslanir seldist upp, en vörurnar munu fást í Hagkaup, 10-11 Austurstræti, Borðinu við Ægissíðu og Fríhöfninni. „Við erum á fullu að fylla á verslanir auk þess að bæta við öðrum verslunum,“ segir Þórdís. „Vörurnar munu einnig fást í verslunum Samkaup og fleiri ferðamannaverslunum. Vörurnar hafa jafnframt fengið alþjóðlega athygli og erum við núna í viðræðum við nokkra aðila í sambandi við útflutning.“
Myndir: Gunnar Leifur.