Það fyrsta sem hin 46 ára gamla fyrirsæta Naomi Campbell gerir á morgnana er að fara með bænir og það er sömuleiðis það síðasta sem hún gerir áður en hún leggst til svefns. Frá þessu segir hún í viðtali í Sunday Times. Í viðtalinu vitnar hún í orð Nelson Mandela um að einstaklingar eigi að leggja öðrum lið. Campbell vinnur ötullega að góðgerðamálum, einkum þeim sem snúa að velferð barna. Undanfarið hefur hún verið við kvikmyndatökur á dramaþáttunum Star. Í viðtalinu við Sunday Times segist Campbell hafa unun af að horfa á raunveruleikaþætti, og nefnir þar sértaklega Real Housewives.

Campbell hugar vel að mataræði sínu og leggur sér vitanlega ekki ruslfæði til munns. Slíkan mat segist hún hins vegar hafa borðað þegar hún var að hefja fyrirsætuferil sinn. Nú viti hún betur. Hún mælir með hugleiðslu, en á síðasta ári var hún á hugleiðslunámskeiði hjá David Lynch. Á sínum tíma komst Campbell iðulega í fréttir vegna villts lífernis og eiturlyfjaneyslu, auk þess sem einkalíf hennar var mjög í sviðsljósinu, en hún hefur átt í nokkrum ástarsamböndum en hefur aldrei gifst. Nú eru breyttir tímar og Campbell segist vera orðin sátt við sjálfa sig. Hún viti hverjum þyki vænt um hana og hverjir séu tryggir vinir og sé ekki í leit að nýjum vinum.

Spurð hvaða ráð hún vilji gefa öðrum segist hún ráðleggja þeim að helga sig einungis því sem þeir hafi ástríðu fyrir.