Tímavélin: Um miðjan febrúarmánuð árið 1990 héldu tveir ungir menn af stað í leiðangur á sendibíl til að selja klósettpappír fyrir íþróttafélag á höfuðborgarsvæðinu. Ferðin endaði hins vegar í fangelsisklefa á Eskifirði.

Mennirnir tveir sögðust ætla að selja pappírinn, um fjögur þúsund rúllur, á höfuðborgarsvæðinu en héldu engu að síður austur á firði og á leiðinni þangað fengu þeir sér sitt lítið af hassi.

Þegar þeir komu austur á Breiðdalsvík brutust þeir inn í vélaverkstæði og stálu verkfærum.

Síðan brutust þeir inn í kaupfélagið á staðnum og tóku myndbandstökutæki, sælgæti og fleira.

Sama dag voru þeir handteknir í Neskaupstað og færðir í fangaklefa.

Rúllurnar voru þá allar óseldar.