Maður að nafni Horace de Vere Cole var einn þekktasti prakkari sögunnar. Hann skipulagði ýmsa hrekki ásamt félögum sínum úr Cambridge-háskóla í Bretlandi, þar á meðal rithöfundinum Virginiu Woolf.

Í febrúar árið 1910 fóru þau um borð í herskipið HMS Dreadnought, dulbúin sem konungsfjölskyldan í Abbyssínu (nú Eþíópíu) og máluð svört í framan.

Asinn var mikill um borð og áhöfnin fann ekki fána Abbyssínu þannig að þeir flögguðu fána Zanzibar og spiluðu þjóðsöng þeirrar eyju.

Cole og félagar töluðu bullmál sín á milli sem samanstóð aðallega af latneskum og forngrískum frösum. Þá hengdu þau orður á skipherrana og hópmynd var tekin fyrir dagblöðin. Þegar hrekkurinn komst upp var áhöfn Dreadnought og breski sjóherinn niðurlægð.

Krafist var þess að prakkararnir yrðu handteknir en að lokum var sæst á að þeir fengju táknræna rassskellingu með vendi.