Georg Alexander Lúðvík, frumburður Vilhjálms Bretaprins og Kate Middleton, er sjö ára í dag og líkt og hefðir gera ráð fyrir voru birtar glænýjar myndir af afmælisbarninu í tilefni dagsins. Að vanda var það hertogaynjan móðir hans sem tók myndirnar af skælbrosandi prinsinum sem teknar voru við heimili þeirra, Anmer Hall, í Norfolk. Þær voru svo birtar á Instagram síðu Kensington hallar.
George litli er sá þriðji í erfðaröð bresku krúnunnar en hann á tvö yngri systikini; Charlotte Elizabeth Diane sem er fimm ára og Louis Arthur Charles sem er tveggja ára. Líkt og yngri systkini Gogga sem eru eru fædd í maí og apríl missir hann af því að klukkunum í Westminster Abbey sé hringt eins og hefð gerir ráð fyrir á afmælisdegi konungsborinna því klaustrinu er lokað fram í ágúst sökum Covid -19.
Fjölskyldan hefur gjarnan fagnað afmæli Georgs á Mustique eyju í Karíbahafi en heimsfaraldurinn setur strik í ferðareikning fjölskyldunnar svo prinsinn heldur eflaust til á heimili fjölskyldunnar í Norfolk á afmælisdaginn.
Goggi litli er glaðlyndur strákur og hann hefur nóg að sýsla á heimilinu. Hann er mikið fyrir náttúruna, sinnir garðyrkju og veiðir kóngulær ásamt systkinum sínum.
Sá stutti á mörg áhugamál og auk grænna fingra er hann í gítarkennslu, lærir að dansa, fer á hestbak og spilar tennis en hann er svo lánsamur að hafa fengið að spila gegn uppáhalds tennisleikaranum sínum, Roger Federer.
Uppáhaldsmatur Georgs er pítsa og ostapasta og eftirlætis kvikmyndin hans er Lion King. Það hljómar sem fínasta uppskrift að góðum afmælisdegi fyrir sjö ára.