Almeda og Gary Hardvick giftust árið 2015, tveimur vikum eftir að þau fóru á fyrsta stefnumótið. Þau kynntust í jarðarför sonar Almedu og vissu strax að þau væru sálufélagar.
Gary var þá 17 ára og hafði nýlega hætt með kærustu sinni, sem var 77 ára. Almeda var 71 árs þegar þau kynntust. Í dag er hann 21 árs og hún 74 ára. Það er því 53 ára aldursmunur á parinu sem sumum finnst óþarflega mikill.
Vinsæl á TikTok
TikTok er vinsæll samfélagsmiðill, sérstaklega meðal yngri kynslóðarinnar. Notendur deila stuttum myndböndum, til dæmis af sér dansa eða gera eitthvað fyndið.
Almeda og Gary nota sína TikTok-síðu til að fagna ást sinni og gera lítið annað en að kyssast í myndböndunum.
Hjónin eru með yfir 15 þúsund fylgjendur á miðlinum og hafa fengið yfir 100 þúsund „likes“.
Tveimur vikum eftir fyrsta stefnumótið giftust þau og stunduðu kynlíf saman í fyrsta sinn.
„Það var yndislegt, fór fram úr mínum villtustu draumum,“ sagði Gary í viðtali við Fabulous Digital.
„Hún er draumakona mín og líkamlegi hluti sambands okkar gæti ekki verið betri.“
„Ég var ekki að leita að yngri karlmanni þegar ég kynntist Gary. En ég vissi það strax að hann væri sá rétti,“ segir Almeda.
Almeda er fjögurra barna móðir og á nokkur barnabörn. Hún missti eiginmann sinn árið 2013 eftir 43 ára hjónaband.
Gary hefur laðast að eldri konum frá því að hann var barn. Hann segist hafa áttað sig fyrst á því þegar hann var átta ára og var hrifinn af kennara sínum.
Þegar hann kynntist Almedu var hann ekki hamingjusamur í sambandi sínu með 77 ára kærustu sinni. Hann fór í jarðarför með frænku sinni og þar hitti hann Almedu.
„Ég tók eftir þessum unga karlmanni sem brosti svo fallega í minningarathöfninni og ég hugsaði: „Vá þetta er sá eini rétti.“ Hann var hinum megin í kirkjunni en ég var alltaf að horfa á hann. Hann var ljósið í myrkrinu,“ segir Almeda.
„Síðan í lok athafnarinnar þá kom hann til mín og vottaði mér samúð. Við höfðum ekki mikinn tíma, en það var nóg.“
Eftir jarðarförina gátu þau ekki hætt að hugsa um hvort annað og fóru á stefnumót.
„Ég spurði hvort ég væri ekki of gömul fyrir hann, ég var 71 árs og hann var bara 17 ára. Hann kreisti hönd mína, brosti og sagði: „Aldur er bara tala,““ segir Almeda um fyrsta stefnumót þeirra.
Tveimur vikum seinna fór Gary á skeljarnar og bað hennar. Almeda segir að þrátt fyrir að hafa verið gift Donald í rúmlega fjóra áratugi sé Gary sálufélagi hennar.
„Ég var gift í 43 ár en það var ekki mikið um kossa og knús, engin rómantík. Núverandi samband mitt er allt annað,“ segir hún.
„Við erum alltaf að hrósa hvort öðru og kyssast. Við erum að njóta hvors annars,“ segir Almeda og bætir við.
„Ég hef lært það að ef þú virkilega elskar einhvern, þá skiptir engu máli hvað öðrum finnst.“