Breska leikkonan Emma Thompson segir að megrunarkúrar sem hún fór á til að halda línunum í lagi hafi farið langt með að rústa lífi hennar. Emma er 59 ára og á að baki langan og farsælan feril í kvikmyndum. Hún hlaut Óskarsverðlaun fyrir besta leik í aðahlutverki árið 1993 og árið 1996 fyrir handritið að kvikmyndinni Sense and Sensibility.
Í viðtali við breska blaðið Guardian um helgina sagði Emma að megrunarkúrar sem hún fór á hafi farið illa með líkama hennar. Kerfið sem sér um að efnaskipti séu í eðlilegu jafnvægi hafi farið úr skorðum og hún finni enn fyrir því í dag.
„Ég hef barist gegn þessum milljónaiðnaði en vildi að ég hefði haft meiri vitneskju þegar ég byrjaði að borða þetta drasl þeirra. Ég sé mikið eftir því,“ sagði hún en fór þó ekki nánar út í það hvernig kúrarnir hefðu komið á ójafnvægi í líkama hennar. Þó er það þekkt hjá fólki sem fastar lengi að það hægist á efnaskiptum líkamans.
Í viðtalinu tjáði Emma sig einnig um geðheilbrigðismál og sagðist fagna því að þau mál væru komin í dagsljósið og í umræðuna. Hún hafi sjálf upplifað þunglyndi á yngri árum en ekki áttað sig á því. Loks ræddi hún einnig um það þegar hún sneri baki við trúnni eftir að prestur gagnrýndi frænda hennar fyrir að vera samkynhneigður. „Þá vissi ég að trúin væri ekki fyrir mig.“
