Game of Thrones stjarnan Emilia Clarke opnar sig um áhrifin sem nektarsenurnar í Game of Thrones höfðu á hana. Hún segir frá þessu í hlaðvarpsþætti Dax Shephard, Armchair Expert.

Hún segist hafa verið þvinguð í „slatta af nekt“ í fyrstu þáttaröð GOT.

Þá var Emilia nýútskrifuð úr leiklistaskóla og aðeins 23 ára. Í dag er hún mun ákveðnari varðandi hvað henni líður vel með að gera og hvað ekki. En á þeim tíma fannst henni hún ekki hafa mátt til að segja eitthvað.

„Ég hef átt rifrildi á tökustað þar sem ég er alveg: „Nei, lakið verður uppi.“ Og þeir eru alveg: „Þú vilt ekki valda Game of Thrones aðdáendum þínum vonbrigðum.“ Og ég alveg: „Fokkaðu þér,““ segir Emilia við Dax.

Hún segir að stundum var þetta svo óbærilegt að hún fór inn á bað og grét áður en hún tók upp sum nektaratriði. Á þeim augnablikum sagði hún við sig sjálfa:

„Það er rangt hvernig mér líður. Ég ætla að gráta inni á baðherbergi og svo ætla ég aftur fram og við tökum upp atriðið og það verður í fínasta lagi.“

Sem betur fer var meðleikari hennar, Jason Momoa, með henni í liði. „Þetta var rosalega erfitt, en atriðin sem ég þurfti að gera með Jason voru yndisleg því hann var alveg: „Nei elskan, þetta er ekki í lag.“ Hann hugsaði um mig líka. Í umhverfi þar sem ég vissi ekki að það þurfti að hugsa um mig.“