Þann 18. ágúst næstkomandi kl. 17 verður haldinn samfögnuður í tilefni af afhjúpun og titlun á nýju listaverki á þaki Hótel Laka í Landbroti. Gestum og gangandi er boðið að koma og njóta léttra veitinga og virða fyrir sér verkið sem nú prýðir einn af útveggjum hússins.
Í verkinu, sem er rúmlega 20fm á stærð, má sjá verur með fuglshöfuð í veisluklæðnaði. Þar eru meðal annars himbrimi í svörtum og hvítum köflóttum jakka og svartröndóttum buxum, lóa í skósíðum dröfnóttum kjól og mólitur spói í kjól með brúnu mynstri. Hugmyndin að verkinu kviknaði á göngu í kringum hótelið, en það er byggt við hliðina á litlu vatni sem státar af ríkulegu fuglalífi. Hinumegin við vatnið er svo álfabyggð en verkið tvinnar saman þessi tvö þemu, huldufólkið og náttúruna, á nýstárlegan máta og leiðir hugann að því hvaðan sögur af yfirnáttúrulegum verum í íslenskri náttúru spretta. Þrusk í gjótum og dularfullt væl í fjarskanum verður svo auðveldlega að heilu huldusamfélagi í frjóum mannshuga.
Ólöf Rún Benediktsdóttir ólst upp á Kirkjubæjarklaustri en flutti sem unglingur í Kópavoginn og hóf nám í myndlist, fyrst á framhaldsskólastigi og síðar við myndlistardeild Listaháskóla Íslands. Eftir útskrift úr LHÍ árið 2013 hefur hún verið virk í sýningarhaldi víða um land. Í myndlistinni skín í gegn áhugi Ólafar á tækni, vísindum og náttúrunni og er hvert verk rannsókn á því viðfangsefni sem hún er að klást við hverju sinni.
