Leikkonan Lily James skaust upp á stjörnuhimininn fyrir leik sinn í Downton Abbey þar sem hún lék lafði Rose. Hún var síðan hin fullkomna Öskubuska í hinni bráðskemmtilegu fjölskyldumynd og fór með hlutverk Natösju í sjónvarpsþáttunum Stríði og friði sem BBC gerði eftir skáldsögu Tolstoj. Nú leikur James á sviði í London í Rómeó og Júlíu eftir Shakespeare. Með hlutverk Rómeó fer leikarinn Richard Madden sem kunnur er fyrir hlutverk sitt í Game of Thrones. Gamla brýnið Derek Jacobi er í hlutverki Mercutio. Kenneth Branagh er annar leikstjóri sýningarinnar.

Gagnrýnendur eru stórhrifnir af Lily James í hlutverki Júlíu og segja hana heillandi. Gagnrýnandi Sunday Times segir hana vera það besta við sýninguna. Gagnrýnandi Daily Telegraph virðist vera gagntekinn því hann sagði leikkonuna vera jafn fagra og Botticelli-málverk. Þeir sem heimsækja London gætu gert margt óskynsamlegra en að fara í leikhús og sjá hina 27 ára gömlu leikkonu í þessu fræga hlutverki.

Áhugi á leiklist hefur verið áberandi í fjölskyldu leikkonunnar. Faðir hennar starfaði sem leikari og tónlistarmaður og amma hennar var rödd tölvunnar um borð í geimskipinu í Alien.