Glamúrfyrirsætan Alda Coco hvetur kynsystur sínar til að deila mynd af sjálfi sér og skrifa undir myndina neikvæða og ljóta hluti sem þær hafa heyrt um sig. Alda tekur frumkvæði og telur upp níðyrðin sem hún hefur verið kölluð:

„Ég hef verið kölluð drusla, yfirborðskennd, of grönn, með anorexíu, feik, heimsk og trans,“ segir Alda.

Í færslu á Instagram hvetur Alda aðrar konur til að gera það sama og hún, deila mynd og skrifa undir það versta sem einhver hefur sagt við þær eða um þær.

https://www.instagram.com/p/CDbXHCpgwWZ/

Í samtali við DV segir Alda að hún reynir eftir fremsta megni að vera meðvituð um sjálfa sig og láta ekki aðra draga sig niður. „En það koma svona dagar hjá manni þar sem maður er viðkvæmari. En ég heyri mikið minna af þessu í dag en áður,“ segir hún.

Alda segir að hún hafi ákveðið að byrja með þessa áskorun eftir að hafa horft á „60 minutes“ með dóttur sinni.

„Þátturinn var um konur sem hafa fengið átröskun, til dæmis vegna samfélagsmiðla. Þær eru mjög ungar, alveg niður í tólf ára. Þetta byrjar oft með því að einhver setur út á að þær séu ekki nógu grannar og oftast þróa þessar stúlkur með sér átröskun og þunglyndi. Mér finnst það mega opna umræðuna hér á Íslandi miklu meira,“ segir Alda.

Foreldrar spila hér lykilhlutverk að mati Öldu. „Ég hef heyrt um að börn hér á landi fá neikvæð skilaboð um holdafar sitt frá foreldrum og sínum nánustu. Ég vil bara benda foreldrum á að við sem foreldrar erum skyldug til að byggja upp sjálfstraust hjá börnunum okkar, hrósa þeim og passa upp á þau. Ég hrósa dóttur minni á hverjum degi því mér finnst hún svo klár, falleg og góð. Ég sé hvað henni líður vel að heyra þessa hluti. Ég sem móðir hennar er auðvitað hennar fyrirmynd.“