„Ég er best í því þegar fólk segir við mig: „Þetta er ekki hægt og verður aldrei hægt…“ Þegar ég trúi eitthvað svo sterkt að ég verð að sjá það gerast, þá finnst mér skemmtilegast þegar allar líkur eru gegn því. Ef það tekst, þá er það svo rosalega mikið kikk.“

Þetta segir Ásdís Halla Bragadóttir rithöfundur í spjallþætti Loga Bergmanns Eiðssonar. Þriðja þáttaröð Með Loga snýr aftur í dag og telur hún sex þætti, en fyrri þáttaraðir hafa vakið talsverða lukku.

Ásdís er einn af stofnendum Klíníkurinnar og fullyrðir að hún sé nýlega hætt hjá heilsumiðstöðinni. Þá segir Ásdís einnig frá heimkomu úr vinnuferð til útlanda á þeim tíma sem hún starfaði sem blaðamaður á Morgunblaðinu. Vegna fjölskyldutengsla tók fíkniefnalögreglan hana afsíðis við heimkomuna og segist hún hafa upplifað mjög mikla niðurlægingu.

„Einhvern veginn er flugmiðinn þess eðlis að ung kona sem fer ein til Hollands, Ítalíu, Bretlands og víðar, henni er flétt upp. Annaðhvort er hún sjálf í eigin innflutningi eða burðardýr,“ segir Ásdís.

„Kerfið gengur út frá því að mér sé ekki treystandi og ég sé örugglega fíkniefnainnflytjandi. Og þau horfðu þannig á mig að það skipti engu máli hvað ég sagði. Þau voru algjörlega ákveðin í því að þau væru búin að finna næsta fjölskyldumeðliminn sem væri í ruglinu,“ segir Ásdís.

Brot úr þættinum Með Loga má sjá að neðan, en næsti gestur þáttarins verður Eiður Smári Guðjohnsen.