Kvikmyndin End of Sentence eftir Elfar Aðalsteins fær góða dóma hjá erlendu pressunni, af fyrstu viðbrögðum að dæma. Myndin hefur verið valin sem opnunarmynd Alþjóðlegu kvikmyndahátíðarinnar í Reykjavík (RIFF) í ár og skartar hún þekktum leikurum í aðalhlutverkum, meðal annars hinum Óskarstilnefnda John Hawkes og unga stórleikaranum Logan Lerman.
Vefmiðlarnir Screen International og Hollywood Reporter lofa myndinni hástert og segja hana vera áhrifaríka þrátt fyrir kunnuglegan efnivið.
„(Myndin er) fallega samsett, vel leikin og nógu klók til þess að koma áhorfendum á óvart í hvert skipti sem framvindan er komin í kunnuglegar áttir,“
segir meðal annars í dómi Hollywood Reporter.
End of Sentence er fyrsta leikstjórnarverkefni Elfars í fullri lengd, en stuttmynd hans Sailcloth hlaut verðlaun sem besta íslenska stuttmyndin á RIFF árið 2011 auk þess að vinna Edduverðlaunin, sem stuttmynd ársins 2012, ásamt því að komast í lokaúrtak BAFTA- og Óskarsverðlauna það árið.
Saga myndarinnar segir sögu feðga er legga land undir fót til að heiðra minningu móður og eiginkonu, en hennar hinsta ósk var að ösku hennar yrði dreift í lítið vatn á æskuslóðunum á Írlandi. Samband feðganna er vægast sagt stirt og á vegferð þeirra um landið kemur margt upp úr kafinu. Myndin var nýlega frumsýnd á Alþjóðlegu kvikmyndahátíðinni í Edinborg og verður afhjúpuð hér á landi þann 26. september.
Fjölmargir Íslendingar koma að gerð myndarinnar á borð við Ólaf Darra Ólafsson, Kristján Loðmfjörð og Evu Maríu Daníels. Þá er myndin framleidd af Sigurjóni Sighvatssyni, David Collins og Elfari Aðalsteins.