Fjölmiðlamaðurinn Eiríkur Jónsson sást ganga út úr kínverska sendiráðinu rétt fyrir hádegi síðastliðinn mánudag með hendurnar fullar af pappírum. Vakti þetta athygli vegfarenda og þá einna helst blaðamanna DV sem sáu til hans. Þeir gripu tækifærið því Eiríkur er þekktur fyrir að flytja fréttir af fólki sem sést á förnum vegi.

Aðspurður hvort hann sé genginn til liðs við Kínverja segir Eiríkur svo ekki vera.

„Sást ég þar? Þetta gekk nú ekki nógu vel, en ég ætla til Kína. Það verða allir að fara til Kína, það er framtíðarlandið. Ég meina, það er framtíðarheimurinn,“ segir Eiríkur sem er á leið til Kína ásamt eiginkonu sinni í apríl og þarf að verða sér úti um vegabréfsáritun. „Það er ekkert flóknara en það. Hvað hélduð þið, að ég væri orðinn blaðafulltrúi kínverska sendiráðsins?“

Leið hjónanna liggur ekki til Forboðnu borgarinnar eða Kínamúrsins heldur til stórborgarinnar Shanghai þar sem sonur Eiríks, Baldur Eiríksson lögmaður, er búsettur. „Ég er að fara að heimsækja son minn sem býr í Shanghai. Þetta verður eitthvað.“