Málverk Kasper Eistrup af Friðriki krónprinsi Dana var afhjúpað í Frederiksborg kastala á föstudag.

Kasper Eistrup er vel þekktur sem söngvari rokksveitarinnar Kashmir, hann er hins vegar eins og sjá má líka góður málari og í dag er myndlistin hans lifibrauð.

Myndin af Friðriki er hluti af nýrri sýningu með verkum Eistrup, sem opnaði á laugardag í National History Museum í Danmörku.

Eistrup hitti krónprinsinn nokkrum sinnum á meðan á ferlinu stóð og segir það hafa verið nauðsynlegt til að kynnast viðfangsefninu. „Ég vildi kynnast persónuleika hans. Og það tókst, það fór mjög vel á með okkur. Hann kom nokkrum sinnum á vinnustofuna til mín án þess að gera boð á undan sér til að sjá hvernig verkinu miðaði áfram,“ segir Eistrup og bætir við að hann hafi spurt hann hvaða framtíðardrauma prins hefur.

„Ég ætla ekki út í smáatriði en samræður okkar hjálpuðu mér að komast að ýmsu sem við höfðum ekki hugmynd um áður hjá Friðriki.“

Rokksveitin Kashmir hætti árið 2014 og í kjölfar þess fór Eistrup að vinna að fullu að málaralistinni og hefur hann þegar haldið nokkrar sýningar.

„Ég hef frá því ég man eftir mér haft þörf fyrir að segja frá. Skrifa eitthvað, búa til myndasögur, smásögur eða sambærilegt. Og þegar ég var lítill sagði ég mömmu að ég ætlaði að verða listamaður þegar ég yrði stór.“

Eistrup líkir myndlistinni við að búa nýja plötu, án hljóðs og tónlistar. „Þetta eru mínar hugmyndir og hugsanir sem eru færðar í útgáfuform.“