Völva DV sér fyrir sér óvæntan popperfingja og gott gengi Baltasar Kormáks
Þetta verður frjótt ár hjá listamönnum á Íslandi og erlendum listamönnum sem munu koma til Íslands að sögn Völvu DV. Samstarf íslensks listamanns og erlendrar stórstjörnu mun vekja mikla athygli. Þetta samstarf mun verða upphafið að einhvers konar nýrri list.
Justin Bieber mun gera allt vitlaust á Íslandi á tónleikum sem hann heldur og hann mun ekki bara halda eina tónleika – heldur mun hann bæta við aukatónleikum. Á þá mun einnig seljast upp á örskotsstund.
Íslensk stúlka kennir Bieber barn og munu þær fréttir vekja heimsathygli samkvæmt Völvunni. Bieber talar fallega um Ísland og tengsl hans við landið munu verða áberandi.
Björk Guðmundsdóttir verður mikið í fréttum. Og þá ekki fyrst og fremst fyrir list. Hún gerir sig æ meira áberandi í stjórnmálum og skiptir sér af Íslandi úr fjarlægð. Fjármál hennar verða til umfjöllunar og reiðist söngkonan og hennar hirð vegna þeirrar umfjöllunar. Heift hleypur í málið. En listamaður með rætur í Þýskalandi stendur eins og klettur við hlið hennar.
Leikhúslífið blómstrar og sækir í sig veðrið. Þó nokkur ný samtímaverk njóta vinsælda og gera góða hluti. Bæði Borgarleikhúsið og Þjóðleikhúsið njóta góðs af. Nýir leikarar koma fram á sjónarsviðið í þessum stykkjum og eru komnir til að vera.
Baltasar kvikmyndagerðarmaður heldur áfram sinni Everestgöngu í Hollywood. Hann landar risavöxnum samningi á þessu ári um gerð stærstu myndar sem hann hefur komið nálægt á sínum ferli. Myndin er talin ein af þeim stærstu sem ráðist hefur verið í. Baltasar er kominn á áður óþekktar slóðir í kvikmyndaheiminum, þegar Íslendingur á í hlut.