Völva DV spáir hjaðningavígum á vinstri vængnum
Síðla árs fer að hylla undir prófkjör hjá flokkunum. Völva DV spáir því að þar komi ýmis ný nöfn fram á sjónarsviðið. Þar á meðal nöfn fólks sem var hætt en hyggur á endurkomu í stjórnmálum. Sérstaklega verður þetta áberandi á vinstri vængnum.
Nokkuð verður um að frétta- og fjölmiðlamenn reyni fyrir sér í þessum prófkjörum. Framundan eru átök. Bræður munu berjast. Hjaðningavígin verða blóðug. Með vinstri vænginn í uppnámi og óvissu um sameiningaráform stefna flestir hátt í prófkjörum og oft hærra en raunhæft er.
Frostavetur er framundan í stjórnmálum undir lok árs. Það frost mun snerta alla flokka en mestur verður gaddurinn á vinstri vængnum.
Athygli vekur að ólíklegasta fólk meldar sig sem Pírata og vill framgang á þeirra vegum. Ekki gleðjast allir sem þar eru fyrir á fleti. Ýmsir úr hópi stuðningsmanna Össurar Skarphéðinssonar vilja sjá hann í framboði næst undir merki sjóræningjaflokksins.