Andrés Magnússon og Stefán Einar Stefánsson blaðamenn á Morgunblaðinu ræddu vinnustað sinn í síðasta þætti Spursmála, sem sá síðarnefndi stýrir, á vef blaðsins. Veltu þeir félagarnir fyrir sér þeirri lífseigu umræðu að Morgunblaðið og þar með þeir sem starfsmenn þess væri hlutdrægur fjölmiðill sem legði sig ekkert sérstaklega mikið fram við að bregða upp eins sannri mynd af þjófélaginu eins og mögulegt sé, en beitti sér fremur með áróðursskrifum til að hafa áhrif á gang mála. Andrés sagði þetta ekki satt en vildi þó meina að það væri óraunsætt að ætlast til þess að fjölmiðlar væru fullkomlega hlutlausir.
Fjallað er um þessa umræðu félaganna, í þættinum, í frétt á Mbl.is og birt brot úr þættinum.
Stefán Einar beindi umræðunni að Morgunblaðinu:
„Það er auðvitað gríðarleg umræða og harkaleg á samfélagsmiðlum og þar rekur maður gjarnan augun í það að það er verið að hnýta í Morgunblaðið fyrir að taka afstöðu. Það er ekkert mark takandi á þessum fréttum af því eru hlutdrægir. Þetta er fjölmiðilli sem er í eigu útgerðarmanna og þar fram eftir götunum. Margir vilja meina að þetta sé ein stór afvegaleiðing.“
Harðorður
Stefán Einar minnist þó ekki í þetta sinn á að hann sjálfur hefur ekki vílað það fyrir sér að beita harkalegu orðfæri á bæði samfélagsmiðlum og í viðtalsþáttum.
Sjá einnig: Stefán Einar svarar gagnrýnendunum: „Augljóst öllum þeim sem ekki eru á einhverskonar lygavagni“
Sjá einnig: Stefán Einar hjólar í Bubba og Sigmund Erni: „Auðvitað stekkur þú strax til. Ekki við öðru að búast“
Sjá einnig: Hraunað yfir Stefán Einar vegna ummæla hans um Nönnu - „Þetta er viðurstyggð“
Hlutleysi
Stefán Einar spyr Andrés hvað valdi þessari umræðu um Morgunblaðið og hversu mjög á skjön hún sé við raunveruleikann hjá flestum lýðræðisþjóðum.
Þar lítur Stefán Einar þó framhjá því að umræður um meinta hlutdrægni fjölmiðla eiga sér stað í mörgum löndum og sýnist þar sitt hverjum. Í sumum lýðræðisríkjum, til að mynda Bretlandi, hefur það þótt eðlilegur hluti af fjölmiðlaumhverfinu að dagblöð taki afstöðu til málefna sem birtist ekki eingöngu í ritstjórnarpistlum heldur einnig fréttaflutningi. Í því samhengi má t.d. nefna dagblöðin Daily Mail og Daily Mirror.
Andrés nefnir sérstaklega hina hatrömu umræðu hér á landi um þjóðaratkvæðagreiðsluna um framhald aðildarviðræðna Íslands við ESB. Hann og Stefán Einar hafa ekki farið leynt með afstöðu sína í því máli og það er yfirlýst afstaða Morgunblaðsins að þessum viðræðum skuli aldrei framhaldið. Morgunblaðið hefur birt fjölda frétta og viðtala þar sem fjallað er um ókosti þess fyrir Ísland að verða hluti af ESB. Stefán Einar og Andrés vilja meina að sjónarmið um kosti aðildar fyrir Ísland fái sitt rými á síðum og vef blaðsins.
Þegar orðin Morgunblaðið og ESB eru slegin inn í leitarvélina Google þá eru allar fréttir og greinar, frá blaðinu, nema ein, sem upp koma á fyrstu 6 síðunum, með niðurstöðu leitarinnar, með fyrirsögnum sem sýna ESB í neikvæðu ljósi fyrir Ísland. Hvort þetta er merki um hlutlægni verða lesendur að meta sjálfir en það skal tekið fram að hér er aðeins miðað við fyrirsagnir sem segja oftast aldrei alla söguna um efni vikomandi fréttar eða greinar.
Andrés vill meina að það sé ekki hægt að ætlast til fullkomins hlutleysis af fjölmiðlum:
„Þeir eru skrifaðir af fólki eða gervigreind, grunar mann á stundum, en þarna að baki er sem sagt alltaf einhver sem þarf að ákveða hvað er fréttnæmt. Það er fréttamat sem ræður.“
Hann segir þá afstöðu Morgunblaðsins að Íslandi sé betur borgið utan Evrópusambandsins liti fréttamat þess að einhverju leyti. Það sé hlutverk blaðsins að draga fram það sem sé vanrækt í umræðunni um Evrópumálin. Morgunblaðið gæti hins vegar sanngirni og dragi margt fram sem stuðningsmenn aðildar Íslands að ESB ættu að geta að vera ánægðir með.
Andrés og Stefán Einar láta þess ekki getið í þessari umræðu sinni að þeir og Morgunblaðið hafa reglulega sakað aðra fjölmiðla um hlutdrægni og skort á hlutleysi. Í þeirri umræðu Morgunblaðsmanna hefur farið einna mest fyrir RÚV.
Sjá einnig: Stefán Einar segir þáttinn valdníðslu af hálfu RÚV:„Áramótaskaupið er í sýningu allt árið um kring“
Hvort þeir félagar telja þar af leiðandi orð Andrésar, um að fjölmiðlar geti aldrei orðið fullkomlega hlutlausir, eiga mismikið við tiltekna fjölmiðla en séu ekki almenns eðlis er því óljóst.
