Allir leikarnir The Odyssey voru viðstaddir frumsýningu stórmyndarinnar í Odeon Luxe á Leicester Square í London á mánudag.
Eins og kvikmyndaunnendur vita var hluti myndarinnar tekinn upp hérlendis, en um er að ræða stærstu tökur sem farið hafa fram hér á landi. Um eitt þúsund manns komu að þeim í júní árið 2025, þar af um 450 íslenskir aukaleikarar. Tökurnar stóðu yfir í 12 daga víða um landið.
Christopher Nolan framleiðir, skrifar handrit og leikstýrir og er myndin hans stærsta hingað til.
Ódysseifskviða fjallar um heimför Ódysseifs, hins goðsagnakennda gríska konungs á eynni Íþöku, eftir Trójustríðið. Heimförin tók tíu ár og var löng og hættuleg. Sagt er frá viðureignum hans við goðsagnaverur á borð við kýklópann Pólýfemos, sírenurnar og seiðgyðjuna Kirku.
Myndin verður frumsýnd hérlendis 16. júlí.
