Kristbjörg hefur verið gift landsliðsmanninum Aroni Einari Gunnarssyni síðan 17. júní árið 2017. Þau eiga saman þrjá syni. Fjölskyldan hefur verið búsett í Katar frá árinu 2019.
Sjá einnig: Kristbjörg opnar sig: „Ég veit að margir eiga erfitt eða hafa stundum átt erfitt með það sama“
„Ég hef verið frekar hljóðlát undanfarið,“ segir Kristbjörg í færslu á samfélagsmiðlum og útskýrir af hverju:
„Það er búið að vera erfitt að koma aftur í Katar eftir þrjá mánuði á Íslandi. Við höfum þurft að sætta okkur við það að loðbarnið okkar Ninja er ekki lengur hjá okkur. Að vakna klukkan fimm á morgnanna, skutla í skólann, pakka nesti, þrífa og reyna að koma húsinu í lag, það hefur verið nóg að gera.
Við þurftum líka að kveðja barnfóstruna okkar til sex ára og erum að leita eftir nýrri til að hjálpa mér með nokkra hluti. Ofan á það hefur verið nóg að gera í vinnunni og ég er að reyna að halda öllu gangandi. Svefninn minn hefur verið út um allt og í stað þess að æfa hef ég verið að leggja mig, bara til að fúnkera. Ég veit að hvíld skiptir máli en ég sakna þess að hreyfa líkama minn almennilega, því líkamsrækt heldur geðheilsunni í lagi. Ég er sífellt að minna mig á að þetta sé bara tímabil og muni ganga yfir.“
Kristbjörg ræðir einnig um loftárásirnar. „Fyrir tveimur dögum gerðu Ísraelsmenn loftárásir á Katar. Að heyra í sprengjunum var óraunverulegt og skelfilegt. Sem betur fer er allt rólegt núna og vonandi verður það áfram þannig, en þetta lét mig hugsa um fólkið í Palestínu sem býr við þennan ótta á hverjum degi.“
Kristbjörg lítur björtum augum fram á veginn. „Þessi árstíð er frekar þung, en ég veit að þetta er tímabil. Hægt og rólega mun jafnvægi komast á ný.“
