Réttarhöld hófust yfir Diddy um miðjan maí en hann hefur meðal annars verið ákærður fyrir mansal, kynlífsþrælkun og fjárkúgun. Árið 2016 réðst Diddy með fólskulegum hætti á þáverandi kærustu sína, Cassie Ventura, á hóteli í Los Angeles.
Myndband af árásinni var fyrst gert opinbert í maí 2024 þegar CNN birti brot úr því.
Eddie Garcia, öryggisvörður á umræddu hóteli, lýsti því fyrir dómi í vikunni að Diddy hefði greitt honum 100 þúsund Bandaríkjadali, 12,7 milljónir króna á núverandi gengi, fyrir myndbandið. Mun honum hafa verið lofað því að aðeins eitt eintak af upptökunni væri til.
Eddie lýsti því fyrir dómi að í fyrstu hefði hann hafnað tilboðinu en sagst ætla að ræða málið við yfirmenn sína. Þeir hefðu samþykkt að láta Diddy fá myndbandið fyrir 50 þúsund dollara.
Þegar Diddy mætti á hótelið til að fá upptökuna hafi Diddy rétt honum umslag sem innihélt 100 þúsund dollara, tvöfalda þá upphæð sem búið var að semja um, og ráðlagt Garcia að ráðast ekki í neinar stórar fjárfestingar. Sagðist Garcia hafa haldið eftir 30 þúsund dollurum en látið yfirmenn sína fá afganginn.
Garcia lýsti því svo einnig að Diddy hefði látið Ventura sjálfa ræða við hann í gegnum FaceTime þar sem hún lýsti því sjálf yfir að hún vildi ekki að myndbandið færi í dreifingu. „Hún sagðist vera að leika í mynd og það væri mjög óheppilegt fyrir hana ef myndbandið myndi birtast.“
Óvíst er hvað varð til þess að myndbandið fór í opinbera dreifingu í fyrra eða hvernig CNN komst yfir upptökuna.
