Um er að ræða hvimleiða aukaverkun af þyngdarstjórnunarlyfjum á borð við Ozempic, Mounjaro og Wegovy.
Fólk sem notar slík lyf grennist gjarnan hratt og mikið og nær líkaminn ekki að fylgja þessu skjóta þyngdartapi. Þetta hefur reynst heppilegt fyrir lýtalækna sem græða á tá og fingri, þar sem margir leita nú til þeirra til að reyna að vinna gegn Ozempic andlitinu.
Sjá einnig: Lýtalæknar græða á aukaverkun vinsæla megrunarlyfsins – Þetta er „Ozempic andlitið“
Nú er ný aukaverkun að vekja athygli sem hefur fengið viðurnefnið „Ozempic fætur“ og er sagt að enginn getur forðast það, ekki einu sinni stjörnurnar sem eiga nóg af pening til að leita til lýtalækna og í annars konar fegrunarmeðferðir.
The Sun fjallar um málið og segir að þetta sé svo nýtt á nálinni að engin stjarna hefur rætt opinberlega um þetta, en þeirra sérfræðingar segja Sharon Osbourne vera meðal þeirra sem eru að glíma við þennan kvilla.
Sharon hefur talað opinskátt um að hafa verið á Ozempic og sagðist dauðsjá eftir því þar sem hún grenntist of mikið og gat ekki bætt á sig aftur.
Hún birti mynd af sér og barnabarni í sófanum horfa á sjónvarpið. Glöggir netverjar tóku eftir því að Sharon hafði átt við myndina en gleymt fótunum. Andlit hennar var rennislétt en aðdáendur sögðu fæturna koma upp um hana.
Lýtalæknirinn Gerard Lambe ræddi við The Sun. „Ozempic fætur eru til í alvörunni og því miður er engin aðgerð sem lagar það,“ sagði hann.
„Allir virðast einblína á „Ozempic andlit“ en það kemur kannski mörgum á óvart að „Ozempic fætur“ er raunverulegt fyrirbæri. Ég hef tekið eftir þessu hjá mörgum sjúklingum sem hafa grennst hratt og mikið með aðstoð þyngdarstjórnunarlyfja.“
