50 First Dates kom út árið 2004 og fór Drew með aðalhlutverk ásamt leikaranum Adam Sandler.
Myndin fjallar um Henry (Adam Sandler) sem kynnist Lucy (Drew Barrymore). Strax fljúga neistar og verða þau mjög skotin í hvort öðru. Næsta dag skilur Henry ekkert í því af hverju Lucy man ekki eftir honum. Hann kemst þá að því að hún þjáist af skammtímaminnisleysi og gleymir alltaf deginum áður. Hann er þó staðráðinn að láta sambandið ganga og reynir á hverjum degi að heilla hana.
Myndin endar vel, þau eru hamingjusöm og eiga fjölskyldu saman. Allir morgnar byrja á því að Lucy horfir á myndband frá Henry sem segir henni að hún eigi eiginmann og börn. Allt er gott sem endar vel, eða er það ekki?
Leikkonan Drew Barrymore greindi frá því í spjallþættinum The Drew Barrymore Show á dögunum að upprunalegi endir myndarinnar hafi verið allt öðruvísi. Lucy sagði við Henry að fara og leita að ást annars staðar þar sem þetta væri ekkert líf með henni.
„Hún sagði við hann: „Farðu og lifðu lífinu. Því þetta er ekkert líf hérna.“ Og hann fór í burtu. Svo kom hann til baka og gekk inn á veitingastaðinn og settist niður og sagði: „Hæ, ég heiti Henry.“ Og myndin endar.“
@thedrewbarrymoreshow 🤯🤯🤯 #50FirstDates #movie #film #movies #drewbarrymore ♬ original sound – thedrewbarrymoreshow
Ross Mathews, sjónvarpsmaður og meðstjórnandi hennar í spjallþættinum, sagðist vera feginn að þau hafi ákveðið að breyta, því þessi endir hefði eyðilagt hann.
Klippa úr þættinum þar sem Drew greinir frá þessu hefur verið að vekja mikla athygli á netinu.
„Vá, ég elska þennan endi,“ sagði einn.
„Þetta er bókaendir,“ sagði annar.
„Veistu, ég elska allt við 50 First Dates, en vá, þessi endir hefði haft áhrif á mig,“ sagði ein.
