Horfðu á brot úr þættinum hér að neðan.
DV spurði Ellý í desember 2023: „Mun ríkisstjórnin lifa af næsta ár?“
„Nei, það eru einhverjar rosalegar hræringar, allt er öðruvísi en við höldum þegar við horfum fram á við. Þetta er ekki dauði en þetta er breyting. Það er að segja, eitthvað þarf að deyja, þetta er ekki mannslíf, höfum það á hreinu. Eitthvað þarf að hætta svo að annað getur byrjað,“ sagði hún.
„Þetta verður rosalegt, eitthvað allt annað en við höldum. Það er ein kona sem er rosalega sterk, brjálæðislega greind og hún á eftir að breyta þessu landslagi í pólitíkinni. Ég held að það verði Kristrún Frostadóttir [formaður Samfylkingarinnar]. Hún á eftir að kalla fram breytingar, ég veit ekki hvernig hún mun fara að þessu en hún verður einhver lykilmanneskja í því að eitthvað breytist svo annað geti hafist.“
Það virðist svo sannarlega hafa ræst úr spá Ellýjar en Kristrún og flokkur hennar fór með sigur í kosningunum í lok nóvember og bættu við sig níu þingsætum. Kristrúnu var í kjölfarið falið umboð til stjórnarmyndunar af forseta Íslands, Höllu Tómasdóttur.
Ellý talaði um að „eitthvað þyrfti að deyja“ svo annað gæti byrjað. Hugsanlega væri hægt að tengja fall Vinstri grænna við spá Ellýjar, en flokkurinn fékk aðeins 2,3 prósent atkvæða í ár og náði engum manni á þing, eftir að hafa verið í síðustu ríkisstjórn.
