Ný auglýsing frá ferðaskrifstofunni Guide to Europe hefur vakið talsverða athygli en í henni má til dæmis finna þær upplýsingar að hið góðkunna Víkingaklapp á uppruna sinn í Skotlandi, eða kannski Tyrklandi.
Allavega er það ekki íslenskt í grunninn þó við Íslendingar höfum nýtt okkur það við fagnaðarlæti ýmiskonar víða um heim. Það var Rottweilerhundurinn og leikstjórinn Bent sem leikstýrði auglýsingunni en hún er lokahnykkurinn á auglýsingaherferð Guide to Europe sem snýr að því að Ísland sé suðupottur áhrifa alls staðar af og þegar upp er staðið þá eru Íslendingar alls konar.
Auglýsinguna má finna hér að neðan en Bent segist nota húmor mikið í allri sinni vinnu. „Í flestum auglýsingaherferðum sem ég hef unnið að í gegnum tíðina, meðal annars fyrir Guide to Europe, NOVA og Lýsi, hef ég reynt að beita húmornum, þar sem ég trúi því að fólk sé móttækilegra fyrir auglýsingum sem eru skemmtilegar. Þegar þannig tekst til tengir fólk brandið sem verið er að auglýsa frekar við gleðitilfinningar og það hefur auðvitað jákvæð áhrif á kauphegðun neytenda. Tölurnar sýna líka að húmor virkar og þess vegna vil ég hafa auglýsingarnar mínar sniðugar og fjölbreyttar,” segir Bent.
